صدام حسين قالو عليه ديكتاتور و عنده أسلحة دمار شامل و بعدها دخلو دمرو العراق ....وبعد سنين اعترفو و قالو تقاريرنا ماكنتش مظبوطه و مش متأكدين من حكاية أسلحة الدمار الشامل دي , احنا أسفين و الله ..معمر القذافي قالو عليه ديكتاتور و ( الثوار ) عملو ثوره جميله و اغتالوه ( و دمرو بلدهم ) , و بعدها بكام سنه طلع وزير بريطاني يعترف ان بريطانيا كان لها دور في اغتيال القذافي ..عمر البشير خلقو له حرب داخليه انتهت بتقسيم السودان لنصين , و في نفس الوقت أقنعوه انه حامي حمى الإسلام و ان النص الجنوني ( التحتاني ) ده كافر و ابن حرام يا جدع , و أحسن انك اتخلصت منه ..فلسطين خلقو لها نزاع داخلي و اقنعو حركة حماس انها تسيطر على قطاع غزه عشان تحوله طبعا لجنة الله في الأرض و تحرر القدس و عكا و البدرشين , و بعد عشر سنين من حكمها كل اللي عملته انها حولت القطاع لوكر أنفاق و مكان للم التبرعات ( من الأسياد ) و المثل بيقول : مين أكل عيش اليهودي ( و القطري ) يضرب بسيفه . و قد كان , اكلو عيش اليهودي و القطري و ضربو بسيفهم فينا احنا , وسط تصفيق حاد و مزمن من ( محرّكي العرائس ) , بس تقسيم فلسطين ده حد جميل , و عماد صاحبي مأكد لي ..اليمن جابو بنت من عندهم كان أخرها تشتغل في محل ملابس و تبيع طرح و باندانات , و ادوها جايزة نوبل للسلام و قالو لها انتي مناضله , وايه رأيك تبقى معانا عشان اليمن السعيد يبقى سعيد أوي ؟ و خربت اليمن على ايد الثوار و بياعة الطرح , و اليمن السعيد بقت تظهر فيه أمراض و أوبئه اتلغت من كتب الطب من 500 سنه ..في سوريا ماكانش ينفع يكتفو بحكاية ان بشار ديكتاتور و بياكل دراع العيال الصغيره , كان لازم زقه جنب الموضوع كمان , وجدتها وجدتها , ده شيعي و علوي و زنديق و اكتشفنا الحكايه دي أول امبارح بالليل , و جابو عربان الخليج بفلوسهم و جابو بهاليل سوريا و العرب و دمرو سوريا و جيشها واقتصادها و بنيتها التحتيه , و عملو تحالف للمسلمين السنه تقوده أمريكا و بريطانيا,أه و عهد الله زي مابقولك كده ..في مصر حاولو بشتى الطرق و الكباري , فتنه طائفيه , ضرب للكنايس , تشويه للأقباط , إرهاب لهم , طب إرهاب للجيش و الشرطه و المدنيين كلهم ؟ طب نلوي دراعها اقتصاديا , طب نعمل قنوات و برامج و نصرف مليارات لتشويه جيشها و تاريخها و مستقبلها , ولا الهوا يا عم الحاج ( زوبعه في فنجان ) ..الكام سنه اللي فاتو فيهم حقيقه مهمه جدا , في منتهى الأهميه .- أمريكا و بريطانيا و الصهيونيه العالميه مش عباقره و بيمشو عالحيط , إنما محظوظين دايما بوجود حكام عرب مابين خائن و متواطئ و عبيط , و وجود شريحة من الشعوب العربيه عندها استعداد فطري إما للخيانه أو للعبط .
يمكن لأعضاء المجتمع فقط مشاركة المنشورات 
تم إنشاؤها في 05 Sep 2023 بواسطة محمود.الباز.1@ 
محمود الباز قائد المجتمع 
تم نسخ الرابط بنجاح
نسخ الرابط