Doaa Gad

أعتقد أن الحياة ماكنتش هتبقى بالصعوبة دي لو أول علاقات في حياتنا كملت وكانوا هما الناس الصح وعيشنا ببساطة، اللي مصعب علينا الدنيا أن الناس فترات وأننا بنتعلق وأننا بنحب وما نطولش.فجأة عزيز علينا يغيب، وأحلامنا تفضل أحلام وما نلمسهاش طول العمر أو نلمسها وتكسرنا، أعتقد أننا لو كملنا مع أول ناس عرفناهم ماكنش ده بقي حالنا ولا دي حياتنا، ماكناش زمانا بنعاني. أعتقد لو العلاقات الاولى بتدوم زي الوجع اللي بيلازمنا بعد فراق أصحابها كان زمانا بخير ومبسوطين وبننقط بهجة، لكن حكم الايام الغلب يسكنا ونكمل مشتاقين ليهم لكن مالناش حق فيهم.أنا جوايا كتير بايظ نفسي يتصلح، كان جوايا فرحة نفسي تكمل بردو، وصحوبية باظت وصحاب غابوا، وناس فجأة انتهوا، وناس تاني قربوا ومشيوا بردو.ليه الدنيا مش بسيطة، ليه الدنيا بالصعوبة دي؟ لما أحنا مش هنكمل وياهم بيجمعنا بيهم القدر ليه ليه ليه؟ لما أحنا مش لبعض ليه نقابلهم؟ ليه نعيش العمر بسكاكين مغروسة في القلب؟ ليه نعاني كده! ليه كل قلبين حبوا بعض مايتجمعوش تحت سقف واحد، ليه مش كل الصحاب تكمل معانا؟ أحنا ليه محطات في حياة بعض؟ صعبة الدنيا، صعبة وقاسية واللهِ.متهيألي لو كنا بنكمل مع أول صحاب عرفناهم وأول حب وعيشنا بنفس النقاء والمشاعر والبرائة كانت هتبقى أسهل وأحلى وألطف وهنعيش يومينا فيها خفاف بقلوب خفيفة ونقابل ربنا وأحنا مبسوطين.لكن أيامنا فيها تقيلة، أيام مش حنينة ولا فيها ذرة رحمة أيام محتاجة قلوب من صخور علشان تقدر تكمل أنما قلوبنا ورق وسبحان من بيجددها ويخلينا نقاوم ونكمل ونعافر من جديد.الإنسان بقي مستني العوض في الجنة مستني رحمة ربنا بيه في الآخرة ليه الدنيا كلها اختبارات واختبارات قاسية كمان، ياريتها كانت فترة وحدة مع ناس وحدة ومشاعر وحدة لكنها الحكمة أنها فترات مع ناس مختلفة ومشاعر بتموت وتحيى وبين كل ده أحنا اللي بنتفرم.وفاء الشقيري.