عشان في أكثر من حدا سألني على الخاص، بخصوص منشوري عن الـ Native ads.ترجمة مصطلح الـ Native Ads، بتكون هي "الإعلانات المدمجة"، وهي على خلاف الإعلانات التقليدية يلي بتزعج المشاهد/المستهلك بإجباريتها، لأنها عبارة عن إعلانات مدمجة بطبيعة الشيء المعروضة خلاله وبتستخدم عدة خدع لإقناع المشاهد/المستهلك بالسلعة/المنتج/الخدمة.كيف؟بدلًا من إنه شركة بيبسي تعمل إعلان فيديو مثلًا من طرفها أو لوحات Bilboards وتنزلها في الشوارع، فهي بتعمد لإنه تخلي علامتها التجارية تظهر مدمجة بداخل إعلان إشي تاني. عادة الإعلانات المدمجة بتكون مقترنة بالإعلانات والتسويق عبر المؤثرين. شوف مثال يعني: شركة بيبسي بتخلي حُكّام Arab Idol يشربوا من كاسات بيبسي في أثناء عرض البرنامج، ولو بتلاحظ كوب بيبسي يلي عالطاولة مش إشي أساسي في العرض، ولكن استخدام لجنة التحكيم (المؤثرين) لهاد الشيء، بيزرع بمخك شيء تجاه بيبسي، والمرة الجاية لم تفكر تشتري مشروب غازي، تلقائيًا، أول اسم بيخطر ع بالك مشروب بيبسي.خلينا نبعد شوي عن الشركات الكبيرة ونروح لأشياء عادية، مثلًا، ممكن شركة دخّان تتعاقد مع كاتب كبير عالفيسبوك، إنه لم ينزل قصصه، ويكون فيها حدا بيدخّن، إنه يكتب مثلًا: "وشهقت من سيجارة الرويال نفسًا عميقًا"، ذكره لكلمة رويال وتكرارها عدة مرات بيعطي مصداقية لاختياره لهاد النوع من الدخّان، والجمهور ما رح يشك إنه إعلان مدفوع، وبالتالي رح يعمل حركة مبيعات.نتائج الإعلان المدمج فعّالة أكثر بكثير من الإعلانات التقليدية، لأنها بتأثر بلاوعي المشاهد، وما بيكون عنده ردة فعل عكسية زي لما يكون الإشي بإعلان Pop-up. كثير شركات مؤخرًا صارت تتجه لهاي الطريقة بالإعلان وخصوصًا عبر المؤثرين، لأنه الناس بالعادة بتثق بزملاتها المستهلكين أكثر مما بتثق بالعلامة التجارية. بهاي الحالة بيكون المؤثر متخفي بثوب المستهلك، ولكنه في الآخر بيكون مسوّق أو مُعلن مقابل أجر.وباي.
13 
نسخ الرابط