الفلايك

في مثل هذا اليوم كنّا في سوسة نعملو كرنافال بابا أوسو.• كانت البلديه تنظف الشوارع من الفجر و الكورنيش الكل يتسيّق و يترش بمواد معطّره خاطر بن علي ممكن يحضر في الكارنافال.• كان البوليس في كل الشوارع و الأنهج واقف من الفجر لآخر الليل في الشيلي و من غير ما يخلص سوايع زايده علی خاطر بن علي ممكن يحضر في الكارنافال.• كانت الشركات و المعامل و الوتله و اللواجات و البياعة الكل يحطو تصويرة بن علي و معاها شعارات المبايعة الأزلية لبن علي خاطر ممكن يحضر في الكارنافال.• كانت الكياسات تتسكّر من نصف النهار و الكراهب الواقفة على الطريق تتفركس و تتشنڤل و فرقة خاصة تهبط تثبّت في سطوحات الديار و الوتله و حتى في الروڤارات إلي في الكياس و الحرس البحري يمنع مرور الفلايك في البحر المقابل الكورنيش خاطر بن علي ممكن يحضر في الكارنافال.• كان البوليس السياسي و جماعة أستفيده يقعدو منشّرين جمعة كاملة قبل الكارنافال في القهاوي يسمعو و يتبعو و يكتبو كل كلمة تتقال خاطر بن علي ممكن يحضر في الكارنافال.• كان رئيس المنطقه و المعتمد و الوالي و رئيس البلديه ما يناموش الليل يديهم على قلوبهم علی خاطر بن علی ممكن يحضر في الكارنافال.••• و في الاخر بن علي ما يحضرش في الكارنافال😂/حاتم الغزال