مكانك

‏الخلافات بتكشف معدن العلاقات الحقيقي، وبيها بتعرف مكانك، ومكانتك بدون تجميل.. فيه اللي في لحظة خصامه معاك لسانه هيخونه ويفلت بكلام اتقل من سبب الخلاف أساساً بس بيكشفلك قلبه كان محمل من ناحيتك بإيه.. فيه اللي خصامكم مصلحة ليكم أنتم الإتنين.. فيه اللي بعد خصامك معاه دنيتك هتنور، وفيه اللي هتكتشف فضيان دنيتك لما يغيب.. فيه اللي مش هيقبل توصلوا لمرحلة الخصام أساساً، وفيه اللي منتظر الخصام لإنه بالنسباله تلكيكة مش أكتر عشان يبعد.. فيه اللي بيخاصم وهو له حق بس مع أول خطوة منك هيمشيلك عشرة لإنه باقي عليك وشاريك.. أوقات الزعل هي اللحظات الأصدق لاختبار عمق أو هشاشة الصداقة، والحب بين طرفين.

‏عموماً الحاجه الوحيده اللي محدش هيختلف فيها ف العلاقات هي "إحساس الأمان" إنك تحس إن مكانك محدش يقدر ياخده، وإن مفيش زيك ولا هيكون مهما ظهر حد تاني أحسن منك هيتقابل بالرفض، وإن غيابك كفيل ميخليش اليوم يعدي، وإنك مهما تعبت أو أنطفيت لسه متشاف أحسن حد ف حياة الشخص اللى بتحبه .

لما تفكيرك ينضج هتعرف إنك مش محتاج حد يكلمك ٢٤ ساعه ولا طول الوقت يقولك كلام حلو بالعكس محتاج حد تكون واثق من مكانك عنده و إن الزمن و الخلافات عمرها ما هتفرقكوا شخص يبقا عارف إنه مهما بعد و قابل ناس ملوش غيرك يستحملك وقت خنقتك و زعلك و يعرف يتفاهم معاك فى المشاكل و يديك الامان.