ترشيحات الكتب الأهم في القراءة الخاصة بالحياة والبيزنيس .. الكتب المرشحة للقراءة .. وجهة نظر شخصية البوست ده تجميعة بوستات كتبتها السنين الي فاتت .. وأنا ليا وجهة نظر مختلفة في الكتب .. انا مش بهتم بالكم على قد ما بهتم بالكيف .. ودايما بكرر .. أن تقرأ كتابا مرتين خير من أن تقرأ كتابين .. الكتب بالنسبالي .. مش حل سحري .. إنما بتديك وجهة نظر للكاتب في حل مشكلة معينة أو توضيح لأمر معين .. عشان كده ممكن أشتري وأقرا كتاب كامل .. عشان فصل واحد .. أو طريقة لتناول موضوع معين .. أو طريقة تفكير في مجال معين .. فالكتاب والكاتب بالنسبالي بيعملوا تركيبة خاصة .. عشان كده هرشح أهم الكتب من وجهة نظري الشخصية .. المرتبطة بالتطوير الشخصي والإدارة والتسويق والمبيعات .. وحاولت أختار الكتب المترجمة للعربي عشان تكون أقرب للكل .. وإلا فالكتب الي بالانجليزي كتير ومش كلها متوفرة في السوق المصري .. عموما يلا بينا .. 1. أهم كتاب عليك إنك تقراه في الحياة .. هو كتاب الله تعالى .. فيه الهدى والنور .. لحياتك ونجاحك في كل محور من محاور حياتك .. لكن بسبب بعدنا عن لغة القرآن .. وضعف علمنا بشكل عام .. بقترح عليك إنك تقرا القرآن بتفسير مبسط يشمل جوانب عقدية وفقهية وسلوكية .. وأفضل التفاسير وأبسطها في الجانب ده .. تفسير الشيخ عبدالرحمن بن ناصر السعدي .. رحمه الله .. اسم التفسير .. "تيسير الكريم الرحمن" .. ومعروف باسم تفسير السعدي .. الشيخ السعدي من المتأخرين .. توفي سنة ١٩٥٦ م .. دور على نسخة يكون فيها تفسير الشيخ جنب الآيات عشان تقرا الاتنين وتربط بينهم .. في نسخ كتير بأسعار مختلفة .. الأفضل هي نسخة دار ابن الجوزي السعودية.2. وتاني أهم الكتب الي لازم تقراها هي سنة النبي صلى الله عليه وسلم .. الي هي المصدر التاني للوحي .. وأهم الكتب الي جمعت سنة النبي صلى الله عليه وسلم بطريقة تجمع العلم والفقه والسلوك بشكل ممتع ومفيد وصحيح .. كتاب رياض الصالحين للإمام النووي رحمه الله .. صاحب العلم والفقه .. وأفضل الشروح عليه .. هو شرح الشيخ محمد بن صالح بن عثيمين رحمه الله .. فزاد الكتاب بشرح ممتع ومفيد خلاه موسوعة كاملة .. في نسخ كتير .. ممكن تختار نسخة دار ابن الجوزي السعودية بس غالية شوية .. أو الآثار المصرية معقوله في السعر.3. وتالت أهم الكتب .. كتب العقيدة الصحيحة .. كتاب الشيخ حافظ الحكمي رحمه الله صاحب الكتب النافعة بطريقة مختصرة ومبسطة وواضحة وبالأدلة الصحيحة .. كتاب أعلام السنة المنشورة .. أو مشهور باسم "٢٠٠ سؤال وجواب في العقيدة الإسلامية" .. ليه طبعات كتيرة .. اختار منها الي يناسبك.4. ورابع أهم الكتب .. عشان تمشي في حياتك صح .. كتب الفقه بدون تعصب .. ومبنية على الفقه الصحيح بأدلته .. وأبسطهم .. كتاب "الملخص الفقهي" للشيخ صالح الفوزان حفظه الله .. كانت عبارة عن حلقات بيعملها في الإذاعة .. كتبها بطريقة مبسطة جدا .. وفيها توجيهات معاصرة جميلة .. ليه طبعات كتيرة .. أفضلها بتاعت دار ابن الجوزي السعودية.5. بالنسبة لكتب التنمية الذاتية الدنيوية .. أفضل الكتب على الإطلاق .. هو كتاب "العادات السبعة للناس الأكثر فعالية" .. ستيفن كوفي .. كتاب فيه حكمة وبصيرة .. ممتاز جدا .. بيتكلم عن العادات الي المفروض تكون عند الي عايز ينجح نجاح كبير في حياته ومليان بالأمثلة والقصص المفيدة الممتعة .. ممكن تشتري النسخة الي في مكتبة نور العلم وكيل مكتبة جرير في مصر.6. واحد من أجمل وأقوى الكتب الي قريتها في حياتي عن أهم عنصر من عناصر القوة في حياتنا .. كتاب "العزيمة" .. أنجيلا داكورث .. هي عالمة نفس قضت أكتر من ٢٠ سنة من عمرها في أبحاث خاصة بالعزيمة .. وازاي هي العامل الحاسم في نجاح الناجحين .. لإننا مهما كانت قوتنا وموهبتنا .. محتاجين للعزيمة عشان نقدر نكمل في الحياة الصعبة الي بنعيشها .. الكتاب ممتع ومبسط .. موجود مترجم في مكتبة نور العلم.7. واحدة من أهم المهارات في الحياة الي بنحتاجها كلنا .. مهارة الإقناع .. وأخيرا نزل كتاب عم الإقناع في العالم .. روبرت سيالديني "ما قبل الإقناع" .. كتاب مهم جدا .. في مكتبة نور العلم.