لسه قدامك الفرصه #ذكر_لعلها_المنجية لو انت شغال في شركة بمرتب 30 ألف جنيه في الشهر، القبض نزل وجه المدير عمل اجتماع لكل التيم وقالهم أنا عايزكم الشهر الجاي تشتغلوا 6 أيام بس وهتقبضوا مرتب سنة كاملة، يعني هتقبض 360 ألف جنيه، ومش بس كده، ده انت كمان مش مضطر تشتغل باقي السنة (الشغل اختياري لباقي السنة) يعني ال 6 أيام شغل كافيين لقبض السنة كاملة.هل يعقل إن إنسان يرفض العرض ده؟ بجد والله، حد ممكن يرفض العرض ده؟ غالبا لأ.طيب في حديث عن النبي عليه الصلاة والسلام قال فيه: إنك لو صمت رمضان وبعدين صمت معاهم 6 أيام بس من شوال، يبقى كأنك صمت السنة كلها. ينفع طيب تفوت الفرصة دي؟"من صام رمضان ثم أتبعه ستا من شوال كان كصيام الدهر".دي فرصة للتقرب إلى الله بعد رمضان. شدوا حيلكم، حتى لو الصيام صعب في شوال، بس الحقيقة الثواب كبير والأجر عظيم