عارف الضحك لما يقلب صياح؟.كان في مقال كدة منشور في مجلة اسمها "The Popular Science Monthly" أو "المجلة الشهرية للعلوم العامة " حاجة كدة يعني. سنة 1896.المقال كان بيتكلم عن اكتشاف نوع جديد طازة من التصوير.اسمه "Sympsychography ".التصوير ده هيسمح لموجات الدماغ الغير مرئية انها تسيب صورة على،لوح تصوير ضوئي. زيها زي اشعه X .بمجرد تفكر في فكرة معينة وتتخيل شكلها وتوجه افكارك للوح ده، هيطبع بصمة وهتعرف تشوف افكارك متصورة 😃.حلو الكلام؟ جميل الكلام.اللي نزل المقال كان العالم "ديفيد ستار جوردن" أو David Starr Jordan. الرئيس المؤسس لجامعة ستانفورد وعالم كبير مش حد قليل يعني.المقال قال ان اللي طوروا التقنية الغريبة دي مجموعة اسمها "the Astral Camera Club of Alcalde"نادي الكاميرا عمومًا او الـcamera club بيبقى تجمع المصورين كانوا بيتناقشوا فيه في تقنياتهم وتطويرها والطرق الحديثة والكلام الحلو ده كله، والطريقة اللي طوروها دي حسب المقال وقتها كانت لأغراض علمية.والمقال اللي بيعلن عن التقنية نزل في المجلة دي بالذات،لإنها كانت موجهة لفئة بارزة في المجتمع من الناس المتخصصة في العلوم وناس دماغها كبيرة مش مجرد هواه.المهم يعني،المقال قال ان التجربة نجحت مرتين، جربوه مع شخص واحد بس وجه افكاره للوح التصوير وفكر في قطة، وطلعت صورة غريبة بس فيها ما يشبه القطة، وجربوها تاني مع 7 افراد من النادي وجهوا افكارهم بنفس الطريقة.وطلعت الصورة الغريبة اللي في البوست دي 😃ديفيد قال ان الصورة فيها انطباع قطة، بس انطباع الدماغ عن شكل القطة الحقيقي بعيدًا عن شكلها في عالمنا المادي، ان ده الانطباع الدماغي للقطط.كلام جميل لحد هنا؟الفكرة بقى كلها ايه؟، لا كان في جهاز، ولا قطة، ولا حاجة بتسجل صور من الدماغ، وفكرة تسجيل صور من الدماغ اصلًا كانت وقتها خيال علمي وحاجة لو قلتها في اي مجتمع علمي هيشعلقوك من فخادك.بس ديفيد عمل الحركة دي بقصد كنوع من السخرية، علشان يشوف ايه هيحصل لما المعلومة تتعرض على مجتمع علمي من شخصية بارزة زيه.وتوقع ان الناس هتسخر منه فعلًا،لا ونزل مقال تاني في جريدة تانية بالتفاصيل بعدها عن ازاي عمل الخدعة دي وازاي ان اللي صمم الصور اصلًا كان "فرناندو سانفورد" الفيزيائي واللي بيدرس في ستانفورد .اللي متوقعهوش ديفيد ان العكس هو اللي حصل.المقال فرقع، الجرائد كلها بقت بتتكلم عنه، المجتمع العلمي طلع منه ناس كتير جدًا جدًااا تحاول تعلي عليه، ومش كدة كمان، لا في رجال دين داسوا في الموضوع.واحد منهم قال لديفيد انه حضر 6 دروس ومواعظ مختلفة عن التصوير الدماغي الجديد للناس اللي بتيجي الكنيسة، وعلماء فيزياء تانيين بعتوله غضبانين منه وبيشتموه. مش علشان التجربة.علشان بيقولوا بما معناه ان اكتشافك الجديد مش هيخليك تعلى علينا. انت ولا حاجة بالنسبالنا.مع انه مكانش عالم فيزياء اساسًا😃.الموضوع اتلم الحمد لله يعني قدر ولطف بس كان اخد فترة كبيرة اوي شغال. وديفيد كتب عنه في سيرته الذاتيه اللي اتنشرت سنة 1922.بس فالحوار كله بيبينلك ازاي موضوع الناس اللي بتحب تعلي على بعض وتهيص في اي هيصة معانا من زمان اوي، ومش بس في المجتمعات العامة عادي لا ده في اي فئة من الناس عمومًا.حبيت اشارك معاكم الصياح ده كدة على بالليل، وليلتكم فل كالمعتاد ❤ #أرشيف_B11
