ميرنا يوسف

فيه ناس تصنيفهم البيولوجي إنسان، لكنهم لا يمتون للإنسانية بأدنى صلة. دة شيء موجود منذ بدء الخليقة، المشكلة بس إنهم بقوا بينزلوا بوستات بيحاولوا يبرروا لا آدميتهم.

مفيش حد حلو وحد وحش: ● فيه حد انت بتحبه وحد انت مش بتحبه من قبل ما يعمل حاجة.● وفيه حد انت حظك انك شفت جانبه السيء اكتر. ● وفيه حد هو اللي محبكش فملطعش الحلو بتاعه ليك.● وفيه حد انتوا الاتنين مش طايقين بعض فبتتلككوا لبعض.● وفيه حد انت شفت منه حاجة غلط قمت أصدرت عليه حكم وعممته على باقي شخصيته. الحلو والوحش أمور نسبية.

عقلك من ناحية هيقرفك بذكريات حزينة.والدنيا من ناحية تانية هتقرفك بمواقف تضايقك.بس خط دفاعك الاول هي ابتسامتك، ابتسم حتى لو ابتسامة عناد مع حزنك.

فيه خناقات عيب أوي ننسبها انها محصورة عند الرجالة أو الستات: ● الخيانة مثلا مش مرتبطة بالرجالة زي ما بعض الستات بتقول.● النكد مثلا مش مرتبط بالستات زي ما بعض الرجالة بتقول. ● الصمت مش مرتبط بالرجالة زي ما الستات بتقول.● التقلبات المزاجية مش مرتبطة بالست زي ما الراجل بيقول. فيه أمور كتير مش مرتبطة بالنوع (ذكر أو أنثى) وفيه أمور كتير مرتبطة بالتربية أو قلتها 😉أو مرتبطة بالخرافات الاجتماعية اللي بنتربى عليها.

الشعور بالقيمة ملوش علاقة بالغرور. المغرور هو شخص فشل في الشعور بقيمته الحقيقية، فبيتعمد يبالغ في إظهار تمتعه بها.