محمد الديرى

لما تبدأ حاجة جديدةفي الاول هتكون نيه و بعدين هتبقى فعل و بعدين تمرين و بعدين ثبات و بعدين عاده و بعدين هتبقي جزء من شخصيتك.كل حاجه بتاخد وقت.. متستسلمش بدري.

*لو انت من النوع الي مبيقولش لأ لحد و بيحط كل كل الناس الاول ده معناه انك مبتقدّرش نفسك كفايه. و ده هيخلي كل الناس الي انت بتحطهم في الاول برده مش هيقدروك. متحطش نفسك في الاخر. لانك انت الوحيد الي هيقدر يخلي كل الي حواليه يقدروه. و ده هيحصل لما تبتدي تقدر نفسك بنفسك. مهم انك تاخد بالك من الحواليك و تعملّهم حاجات حلوه و اوقات تيجي علي نفسك. بس مايكنش ده الحال دايماً.

الثقة في النفس مش معناها انك تبقي حاسس انك بتعمل كل حاجة صح او انك مش بتغلط. بس معناها انك تكون عارف ان كلنا بنغلط و انك هتغلط.. بس واثق من انك هتعترف بالغلط و هتعرف تصلح الغلط قبل ما الدنيا تطربق علي دماغك او دماغ حد تاني.

*محدش عمره ما هيعرف انت مريت ب ايه في حياتك و وصلت للي انت واصله ده ازاي.*سواء انت واصل لحاجه كويسه او مش كويسه (مع ان مفيش حاجه مش كويسه لان كل حاجه بتوصلك للاحسن)، بس كل واحد جواه شخص بيحكم علي الي حواليه مجرد انه شايف قدامه معلومات قليلة جداً. مَتِزعلش ان الناس بتحكم عليك، دي حاجة طبيعية انها تحصل. بس شطارتك انت انك تحاول متحكمش علي حد غير لما تتعامل معاه و تعاشره تتحط معاه في مواقف تبين إذا كان كويس وسند ولا أي كلام.

انك تبقي شخص إيجابي ، مش معناها انك تبقي مغّيب عن حقيقة الوضع. الايجابية هي انك لما تبقي في محنه أو ضيقه ، تبقي عارف و فاهم انك مش في احلي مكان، بس عارف انك ممكن تشتغل علي نفسك و انك ممكن تطلب مساعده و انك هتعدي المحنه ديه و توصّل نفسك لمكان احسن مع الوقت. الايجابية لازم يجي معاها مجهود كبير و صبر و تعب. خليك إيجابي 💪🏾