يوسف شعبان

*حَل المشاكل هي سنّه الحياه.* مفيش حد معندوش مشاكل، ولو حياتك مافيهاش مشاكل محتاجه حلول، يبقي فيه حاجه غلط. نظرتك للمشكلة محتاجة متبقاش سلبية ، لانك كده ولا كده هتتحط في مواقف فيها مشاكل محتاجة حلول. مجرد انك تبص عليها بنظره انك بتكتسب خبرة كل مرة بتوصل فيها لحل، ده هيخليك تعيش حياتك بطريقة إيجابية اكتر و تحمد ربنا علي كل حاجة خلاك تعدي فيها. انت مش لوحدك 💪🏾

خلاف الوعود من اكتر الحاجات الي ممكن تضر العلاقاتك الاجتماعية ، العاطفية و علاقات العمل. من اهم مبادئ العلاقات بين الناس هي ان يكون فيه ثقة. و خلاف الوعد هو اكبر عدو للثقة. قبل ما توعد حد بأي حاجة لازم تكون مفكر كويس جداً علي قدرتك علي انك توفي بوعدك و و خاصة لما تكون ظروفك صعبه. لان وقتها انت برده مطلوب منك انك توفي بيه. لو هتوعد، خليك ١٠٠٪؜ متأكد انك هتوفي بوعدك.

النضج هو انك تعرف تاخد قرارات مبنية علي خططك و اتجاهك في الحياة. مش بناء علي حالتك العاطفية او مشاعرك 💪🏾

*متتكسفش تقول لأ*اوقات بنخاف علي زعل الناس اكتر من ما بتخاف علي صحتنا النفسية. لما تعود نفسك انك بتقول اه علي اي حاجة بتتطلب منك منغير ما تفكر كويس، هتوصل لمرحلة انك شايل من الي قدامك عشان طلباته هتكتر عليك و هتكرهه بعد كده. لما من الاول تقول لأ بطريقة مفهومة و مشروحة ، هتلاقي نفسك حاطط حدود للطلبات و ده هيخلي الناس تحترمك و هتقدر اكتر الحاجات الي هتعملهالهم. ما تخافش، حب الناس ليك مش مرتبط بالحاجات الي بتعملهالهم.

عشان تطور عاده منتظمه و تكون العاده دي جزء من حياتك اليوميه محتاج تكون عملت العاده دي كل يوم لمدة ٣ شهور. يعني لو عايز تعود نفسك انك بتصلي كل يوم و توصل لمرحلة ان جسمك و مخك حافظين مواعيد الصلاة و اول ما الأذان يأذّن تلاقي الأوتوماتيك بتاعك انك قمت اتوضيت و صليت، محتاج اول ٣ شهور تكون بتعمل كل المنبهات و تخلي اصحابك و اهلك يفكروك و يساعدوك و يبنهوك انك تقوم تصلي. بعد ال٣ شهور كل حاجة هتلاقيها بتحصل لوحدها. و ده بينطبق علي كل حاجة. التمرين، الاكل، الروتين الصباحي و الروتين المسائي. فكر انت معود نفسك علي ايه صح و ايه غلط و ابدأ واحدة واحدة انك تغير من سلوكك و روتينك عشان توصل للي انت عايزه. اول ٣ شهور هيحتاجوا شغل بس بعد كده الموضوع هيكون اسرع و اسهل.