مسلسلات_رمضان_2019#
تغطية #مسلسلات_رمضان_2019 كانت تجربة مسلية وصعبة لأن اول مرة اتابع 5 مسلسلات في شهر واحد😄 سعيد اني قدرت أخوض التجربة لنهايتها وأتمنى تكونوا استمتعتوا بالتغطية اليومية للمسلسلاتايه اكتر مسلسل عجبكم واكتر مسلسل احبطكم السنة دي؟هتلاقوا في التعليقات لينكات لرأيي في ال5 مسلسلات
التقييم النهائي لمسلسل #بدل_الحدوتة_تلاته الفكرة نفسها مش جديدة لأن كان سبق ليلى علوي عملتها في "حكايات وبنعيشها" على مدار موسمين وكانت بتقدم حكايتين في مسلسل واحد.. بس المرة دي دنيا سمير غانم بتقدم ٣ حواديت في مسلسل كامل وال٣ حواديت كوميديا فقط. .. فريق العمل الأساسي متكون من دنيا، عمرو وهبة، شيماء سيف ومحمد أوتاكا وكمان عندنا أيمن وتار مؤلف ال٣ حواديت وكمان خالد الحلفاوي في مقعد الاخراج* الحدوتة الأولى (بيلا) فكرة لطيفة لكن الكوميديا كان ممكن تكون أقوى من كده بكتيييير. حلقات حلوة وحلقات ضعيفة. ضيوف شرف جيدين وأخرين لم يضيفوا شئ. دنيا لها حضور جميل لكن محمد سلام هو افضل ما في الحدوتة الأولى (6/10) * الحدوتة الثالثة (عودة لهفة)أفضل من الحدوتة الأولى في الكوميديا وأداء الممثلين وضيوف الشرف. نسبة فعالية الضحك مش 100% وفي حاجات بسيطة كانت ممكن تكون أفضل. مساحة شخصية ساره عبد الرحمن كان ممكن تكون أكبر وفي بعض ضيوف الشرف اخدوا مساحة أقل من اخرين لكن اجمالًا انا مبسوط. دنيا ممتازة في اداء شخصية لهفة. أحمد رزق اضافة حلوة للحدوتة ورغم الكوميديا الجيدة اللي بيقدمها في شخصيته لكن مشاعر حبه للهفة بدون انتظار مقابل وتضحيته لها جسدها بشكل ممتاز. عمرو وهبة واخد مساحة حلوة. القصة نفسها مش سطحية قوي لأن بتناقش حرب السوشيال ميديا والمؤثرين. الناس اللي عاوزه تشتهر بأي طريقة، التنمر وحقيقة بعض مشاهير السوشيال ميديا. موضوع حلو وله قيمة والمسلسل قدمه بشكل كويس ومانسيش هدفه الأساسي وهو الضحك (8/10) * الحدوتة الثالثة (لولي) الحدوتة الأفضل على جميع الاصعدة. الاجواء طفولية لكن معمولة حلو جدًا من اول سمير غانم وهو بيحكي الحكاية على طريقة The Princess Bride لحد أجواء مزرعة البطاطس وشخصية لولي اللي تحسسك ان دخلت في عالم شبه ديزني كده. الملابس والديكورات جميلة جدًا. القصة بسيطة جدًا و مكتوبة بشكل ممتاز. تركيبة الشخصيات كلها حلوة. المواقف والنكت حلوين وضحكوني من قلبي. الممثلين كلها في أفضل احوالهم. دنيا قدرت تدي تعبيرات الأطفال بشكل حلو جدًا. هشام ماجد رائع ومحمد أوتاكا رهييييب. الاخراج من خالد الحلفاوي هنا كمان كان متفوق على الحدوتين اللي قبلهم. ضحكت وتأثرت وانسجمت جدًا من الحدوتة دي (10/10) اجمالًا، التجربة حلوة بالرغم من اختلاف مستوى ال٣ حواديت.. . اتمنى دنيا تكرر نفس التجربة ولكن ياريت لو يكون لكل حدوتة مؤلف ومخرج مختلف بحيث تكون في فرص لناس تانية تشتغل وتجرب.. دنيا ممثلة جواها طاقات رهيبة جدًا8/10 #مسلسلات_رمضان_2019
#مسلسل_هوجان ... التقييم النهائيسيناريو كلاسيكي متقن جدًا. شخصيات مكتوبة بعناية ولها سمات مميزة جدًا. الحوار متفوق جدًا ويكاد يكون أفضل حوار في ال٥ مسلسلات اللي تابعتهم. سر تميز الحوار انه ملائم جدًا جدًا لطبيعة الشخصيات. ده غير الافيهات الحلوة اللي مش طالعة استظراف لأ دي طالعة من الشخصيات نفسها وطريقتها. الشخصيات كلها حبيتها وعشان كده كنت بتابع باهتمام شديد جدًا. الاحداث مزيج من الكوميديا والدراما ومعمولين حلو. اهتميت بشخصية هوجان وتأثرت بكل اللي حاجات اللي حصلت له. المسلسل ده اكتشاف لقدرات محمد امام لأنه عامل شخصية حلوة وقدم اداء فيه تطور كبير له كممثل. اجتهد جامد وأثارني عاطفيًا في عدة مشاهد. كمان هو اشتغل على نفسه بدنيًا وقريب هيعمل اسم كبير في سكة الاكشن كوميدي لأنه لايق جدًا.. مفاجأة المسلسل بقى كريم محمود عبد العزيز في دور لطفي الحراق 🌶️😄 الشخصية دي حكااااية واداء كريم رائع. أسماء أبو اليزيد موهبة جبارة. صلاح عبدالله، محمد أسامة اوس اوس، منصور، عارفة عبد الرسول ورياض الخولي ممتازين. أقل اداء في المسلسل من نصيب الممثلة اللي عملت دور نور. الشخصية نمطية ومفيش مشكلة في ده بس الاداء نمطي جدًا بينما شخصية كمال اللباد نمطية إلى حد ما بس شوف اداء رياض الخولي كان حلو ازاي. المخرجة شيرين عادل عملت شغل جيد جدًا. قادت فريق التمثيل بمهارة، اهتمت بتفاصيل كتيرة وقدمت مشاهد جيدة جدًا ولكن يعيب شغلها تنفيذ بعض مشاهد الاكشن اللي كانت ممكن تكون أفضل رغم اجتهاد محمد امام فيها وعشان كده بقول هو عنده فرصة حلوة يمشي في السكة ديمسلسل هوجان هو مفاجأة رمضان 2019 بالنسبالي لأن ماكنتش متوقع يعجبني بالشكل ده. في رأيي الشخصي، هوجان ثاني أفضل مسلسل بعد قابيل8.5/10 #مسلسلات_رمضان_2019
#مسلسل_لأخر_نفس .. التقييم النهائيعارف المسلسل اللي تتفرج عليه وماتتضايقش منه رغم ان مفيهوش عناصر تميز كبيرة؟ هو ده كده. رغم انه بدأ بقوة شديدة جدًا لكنه بعد كده فقد كتير من بريقه خصوصًا اننا كنا سابقين ابطالنا بخطوة. في خطوط فرعية كتير واتقفلت بشكل كويس لكن خط شخصية سليم وخطة اخته وزوجها عليه هى اسوأ حاجة في المسلسل. اخدت كمان مساحة كبييييرة جدًا بدون داعي. في بعض الأخطاء في المونتاج وتنفيذ مشاهد الاكشن. في النهاية يُحسب لياسمين عبد العزيز التجديد واتجاهها للاعمال الدرامية الجادة وعندها فرصة تحسن من نفسها. أفضل الاداءات في المسلسل من نصيب فتحي عبد الوهاب ومحمد عز.6.5/10 #مسلسلات_رمضان_2019
مسلسل #الواد_سيد_الشحات ... التقييم النهائي بما انه مسلسل كوميدي سطحي معتمد على تقديم اسكتشات مختلفة كل حلقة او حلقتين ومفيش اي خطوط فرعية أخرى بيمشي عليها بجانب الخط الرئيسي بتاع تجميع الفلوس، فأنا دلوقتي بحاسب المسلسل على الضحك بشكل رئيسي. من وجهة نظري الضحك متوسط. في حلقات حلوة وفيها افكار جامدة وبتضحك جدًا وفي حلقات للأسف ضعيفة جدًا جدًا في الكوميديا والبعض منها كان لا يطاق. من مفاجأت المسلسل ان محمد عبد الرحمن يكون أفضل من أحمد فهمي وبجد سرق الأضواء منه جامد. هنا الزاهد مقبولة وفي بعض الحلقات القليلة اجتهدت فيها جدًا. محمد محمود في دور السحاوي حلو. ضيوف الشرف مش كلهم حلوين. أحمد الجندي مخرجًا اجتهد في حلقات وحلقات لأ.. إجمالًا المسلسل متوسط في كل حاجة ورغم انه أقل مسلسل في ال٥ مسلسلات اللي تابعتهم لكنه ماوصلش لدرجة اني اتضايق منه ومرة كمان محمد عبد الرحمن شال المسلسل على كتفه6/10 #مسلسلات_رمضان_2019
نسخ الرابط