افرحوا لما ربنا ينوّر بصيرتكم، لما تتعاقب عليك الشدائد و الاوقات الصعبة بس لو بصيتلها هتلاقيها بتعلّمك و بتهذبك و بتفوقك انك ماشي في سكة غلط و لازم تقف مع نفسك و تعيد حساباتك قبل يوم الحساب..بتعلّمك انت جاي في الدنيا دي ليه ، و رسالتك ايه و مطلوب منك ايه ؟ البصيرة هي نور طالع من القلب اللي لسه فيه خير و عمار بتفوّقك وقت ما الدنيا تلهيك و تبعدك عن العبادات و الطاعات و تخلي الشيطان سايقك في كل عيشتك!مش ساعات تلاقي حد صاحبك مكانش بيصلي و لا بيركعها و فجأة اتقلب حاله و مبقاش يسيب فرض.. تلاقي بنت متحررة في لبسها و فجأة التزمت .. و تيجي تسألهم بيقولولك فجأة حسينا اننا لازم نتغير و شوفنا الدنيا بشكل تاني سبحان الله ..في ناس كتير معميّة و تايهة في سكة كلها ضياع و بٌعد عن ربنا و محرومين من نعمة نور البصيرة و كشف الغشاوة اللي عامياهم عن الوحِش اللي جواهم و الوحِش اللي حوليهم ، فا بقوا متحاوطين بالعمي من كل حتة زي الكماشة ! ادعوا ربنا بالبصيرة.. انه يرزقكم التفرقة بين الحلال و الحرام و الحق و الباطل .. يرزقكم الثبات علي الفروض و الطاعات و عدم الانجراف وراء كل المغريات و الفتن اللي حولينا.. يرزقكم بتشغيل دماغكم مش الجري ورا اللي الناس بتعمله و خلاص! يرزقكم بالثبات حتي لو لسه في اول الطريق مش ان كلمة توديكم و كلمة تجيبكم ..يرزقكم بقلب مش عايز يغضب ربنا فا بيتقي الله في تصرفاته..اللهم ارزقنا البصيرة لنرى بها نور الحق، واجعلنا دليلاً يقود الناس إلى القرب منك.نسأل الله أن يرزقنا البصيرة وأن يصلحنا ظاهرا وباطنا وأن يقينا شر الغرورفلنحاسِب انفسنا قبل ان نُحاسب.