Youssef Ragab

شخص بيسأل مصطفى حسني : "ازاي في الأيام المُباركة دي نتوب ونبقى كأننا لسه مولودين؟"رد عليه وقاله : "دي اسمها التوبة النَصوح، إنك تقول اللهُم إنّي أستغفرك مِما أعلم ومِما لا أعلم ومِما أنت به أعلم إنك أنت الأعز الأكرم .. يعني أستغفرك يارب من ذنوب عملتها وعارفها وفاكرها، وأستغفرك من ذنوب أنا عملتها ونسيتها، وأستغفرك من حاجات أنت تعلمها عنّي وإدراكي من كُتر ماهوّ ضعيف ما أدركتش أصلا إنها حرام". وقال أهم ٣ أدعية تدعي بيهم في الأيام دي :١- إن ربنا يعينك على اللي أمَرَك بيه ، وعشان كده الرسول ﷺ علِّم الصحابة دعاء "اللهُم أعنّا على ذِكرِك وشُكرِك وحُسن عبادتك" بعد كل صلاة .. وكان من أكثر دعاء النبي ﷺ "اللهم يا مُقلِّب القلوب ثبِّت قلبي على دينك". ٢- اللهُم اجعلنا عبيد إحسان ولا تجعلنا عبيد امتحان، معناه : اللهُم خُذ بأيدينا إليك بالعطاء ولا تأخُذ بأيدينا إليك بالبلاء" بمعنى أوضح، خُد بإيديا ليك يارب بالعطاء والفرح والسعادة مش بالاختبار والحزن والبلاء .. لكن لو حصل البلاء فَأنا راضي بِما يختاره رب العالمين. ٣- والدعاء بالعِتق من النيــران في كل سجدة : "اللهم أعتِق رِقابنا من النــار وأدخِلنا الجنة بغير حساب ولا عــذاب". وقال : عارف يعني ايه "أعتِق رِقابنا من النــار"؟ يعني تكمل حياتك واقف على باب ربنا، تنزل قبرك مع أول لحظة تشوف مكانك في الجنة، وتقوم من قبرك على ضِل عرش ربنا، واقف جنب الرسول ﷺ بتشرب من إيده الشريفة. يارب اكتبنا من العُتقاء. 🤲🏻وقال كمان اللي مش قادر يدعي، يَذكُر الله، ربنا بيقول في الحديث القدسي ( مَن شَغَله ذِكري عن مسألتي، أعطيته أفضل ما أُعطي السائلين ) لو انت مش عارف تدعي اذكُر الله كتير وقول لا إله إلا الله وربنا عليم باللي جواك واللي انت عايزُه .. سيدنا إبراهيم قال "ربنا إنك تعلم ما نُخفي وما نُعلِن وما يَخفى على الله من شيءٍ في الأرض ولا في السماء" لما ساب ابنه إسماعيل وزوجته السيدة هاجر وراح يدعو الناس بأمر من ربنا في الشام، وربنا بيقول { يعلم السِر وأخفى } حتى لو متكلمتش هو عارف". ♥️