ببساطة

انا حرفياً استوعبت خلاص ان مفيش اهم من صحتي و سلامي النفسي ، هو دا اللي اولي عندي دلؤقتي اني احافظ عليه ، مابقاش فارقلي بيحصل حواليا ايه ؟ ولا مين قال عني ايه ؟ ولا دا عمل كده ليه ! ، بقيت شايف كل دا فعلاً اهيف ما يكون بالنسبالي ، و اقل من انه يشغل بالي او ياخد حتي مساحة من تفكيري ، بقيت موفر كل طاقتي لنفسي ، بعيد عن اي مجادلات او نقاشات طويلة مع اي حد ، بعيد عن اي ضغوطات و حرق اعصاب في زعل و عتاب و خلافات ..ببساطة كده تقدر تقول " اني كبرت دماغي من الدنيا كلها و اشتريت راحتي و نفسي "..

ماتهملش حاجة و تقصر في حقها ، وترجع تدور عليها ، و تستغرب راحت منك ليه ؟ وامتي ؟ و ازاي ؟! كانت معاك وبين ايديك ، لا اديتها اللي تستاهله من حبك ، ولا من مشاعرك ولا وقتك ولا مجهودك ، لحد ما ببساطة رصيدك كله خلص منها .. اي حاجه من غير اهتمام ، مهما طال وقتها معاك ، صدقني هيجي اليوم اللي هتسيبك فيه و تمشي ..اصل الاهم من انك تخلق احساس حلو جوه حد ، او انك توصل و تحقق حاجه كان في يوم نفسك فيها ، هي انك تستمر في اهتمامك و شغفك .. ماتبطلش تسقي الوردة اللي زرعتها ، و تستغرب ماتت ليه !