نسخ الرابط
Mohamed Abdel Mohsen
No matter how much you think you know about me, you only know what I want you to know.
اللّي شاف فيلم Gladiator بتاع راس كرو هياخد باله من حاجة ...إن رياضات القتالية في روما فالفترة دي كانت حاجة أساسية وضرورية ومهمة وبتستقطب الجمهور كلّه، عشان دي كانت فترة سيطرة وهيمنة الإمبراطورية اللّي كان الجيش جزء أساسي فيها فكان الشباب يا بيتم تجنيدهم إجباريًا يا بيتطوّعوا في سبيل إثبات ذكوريتهم وإنّهم رجال أكفاء .. وعليها بيتم نحت وصقل تماثيل بيمثّلوا أشخاص بيمارسوا الرياضات دي أو مقاتلين ومحاربين وبيتعمّذوا يبرزوا فيهم الواقعية والجسم الممشوق والرياضي ...ودا واحد منهم .. .تمثال مُلاكم برونزي من القرن الأول قبل الميلاد في المتحف الوطني الروماني في روما إيطاليا ...واخد بالك من دقّة التفاصيل ..؟
دلوقتي في فالإنجليزية مُصطلح اسمه Portmanteau معناها الحرفي شنطة سفر كبيرة أم سوستة فالنُص دي، بس ليها معنى تاني بيوصف كلمة مكوّنة من أكتر من كلمة لمّا بيتحطّوا مع بعض بيدّوا معنى مختلف عن معنى الكلمات اللّي بتكوّنه .. مثال عالـ Portmanteau دا بقى .. عندك فاللّاتينية كلمة Ecce بتيجي بمعني I present to you أو "أنا أقدّم لك" .. وكلمة dentes بمعنى أسنان زي ما كتير عارفين، ودي اللّي جاي منها Dentist يعني طبيب أسنان وفي بعض الأحيان بتيجي في مُصطلحات بمعنى إبتسامة أو "ظهور الأسنان" .. في حين إن الـ suffix اللّاتيني iast لما بييجي في آخر الكلمة بيدُل على القائم بالفعل أو شخص ما بيؤدّي الفعل دا أو يُمثّله .. زي كلمة enthusiast بمعنى مُتحمّس بس المعنى الحرفي ليها إنّه الشخص اللّي بيستعرض مشاعره قدّام الناس من فرط الإثارة .. .دلوقتي بقى إنت لو حطّيت كل دول ورا بعض هتطلع بكلمة Eccedentesiast ( وتُنطَق إكسي-دينتي-سياست ) ودي كلمة مُستحدثة في الإنجليزية معناه الحرفي "أنا أقدم لك أسناني أو إبتسامتي" والكلمة دي بتصف الشخص اللّي بيتصنّع الإبتسامة عشان يُخفي حُزن أو ألم .. أو الشخص اللّي بيُمثّل إنّه مبسوط ومُبتسم عشان ميباينش إنّه متضايق ...يعني كلنا Eccedentesiasts بطريقة أو بأخرى ... #آخر_رف_فوق
من كام سنة إتجمّع مجموعة من العلماء في جامعة واشنطن وعملوا تجربة أثبتت حاجة غريبة شوية ...جُم في حقل واسع كدة وحطّوا أكل للغربان وسابوه، مع الوقت الحقل دا إتعرف للغربان إنه في أكل وبقوا بيتلمّوا عليه .. ومن هنا بدأت التجربة، في إنهم لبسوا أقنعة على وشّهم وجابوا جثّة غراب متحنّط وحطّوها جنب الأكل وسابوها، فإيه اللي حصل بقى؟.الغربان سابت الأكل وبدأت تستكشف فالجثّة المرمية وتقلّبها يمين وشمال لحد ما إتأكدت إنها لغراب ميّت عشان تطير بعيد عن الأكل وعن المكان كلّه ويبدأوا يصرّخوا وينبّهوا بعض إن المكان دا فيه خطر لدرجة إنهم بقول بيحذّروا الغربان اللي جايّة جديد عالمكان مش عارفة في إيه .. !.ولما العلماء حاولوا يقربوا، بعض الغربان هاجمتهم على أساس إنهم خطر مُحتمل، حتّى وهم مش معاهم أي جثث ولا حاجة في إيديهم وحتّى لما بدّلوا الأقنعة مع بعض، الغربان فضلت تصرّخ بالصوت بتاعها دا عشان تنبّه باقي الغربان إن دا نفس الخطر الأولاني اللي إتسبّب في موت الغراب .. !.لما العلماء عادوا التجربة مع طيور تانية من ضمنهم الحمام، مفيش حاجة حصلت والحمام مصرّخش ولا عمل أي حاجة مختلفة وكمّل عادي لأ ولمّا حطّول جثة حمامة متحنّطة قدام الغربان، الغربان مصوّتطش عشان مش من نفس فصيلتهم فبالنسبة لها دا مش خطر عليهم .. !.التجربة دي أثبتت إن الغربان فيها حاجة مختلفة عن باقي الطيور دي بنسبة ذكاء وتحليل أعلى وبتشتغل أكنها جهاز إنذار لباقي الطيور من نوعيتها فبيخافوا على تجمّعاتهم وبيحموا بعض .. ! .وبالمناسبة الصريخ دا ملوش علاقة بالتشاؤم من الغراب اللي عند أغلب الناس، الفكرة دي تطوّرت في عقل الناس من الأثر وحكايات الأولّين إن في قصة قابيل لما قتل هابيل وفضل يلف الأرض سنين شايل جثّته مش عارف يعمل بيها إيه ربنا أوحى للغراب إنه ييجي قدّامه ويدفن جثة غراب تاني عشان يعلّمه، فكان أول فعل يتشاف من الغراب هو الدفن .. .عشان كدة بقى رمز للتشاؤم .. #آخر_رف_فوق
بمّا إنّنا بقالنا كتير محاكيناش مع بعض هنا، تعالى نرجع تاني وأحكيلك حاجة جديدة ...عارف لما حد عزيز عليك يتوّفى؟ الشخص اللي بتحبّه يسيبك أو تنفصلوا؟ لمّا تصيبك أي مصيبة تحسسّك إن مفيش أمل؟ أو حتّى توتر دائم ونفسية على طول مش متظبّطة وقلق وقلة نوم و.. و.. تفكير كتير أو زي ما التريند اللي ماشي بتاع الـ overthinking؟.ساعتها لو سألتك أوصفلي شعورك هتقولّي إنك حاسس إن الدنيا قفّلت فوشّك، ملكش نفس تعمل حاجة وقلبك بيتعصر من الحُزن وضرباته بتختلّ كدة وكأن في ألم بيقطّعه حتت وألم حقيقي مش مجرد الوصف الأدبي لمشاعرك، لأ ألم في نصّك الشمال وتُقل على صدرك وبتاخد نَفّسك بصعوبة وكأن حد لافف صوابعه حوالين قلبك بيعصره كدة .. وكل دا مع شوية مشاعر سلبية من إنكسار ومرارة وحسرة وكدة..إنت كدة وصفت أعراض حقيقة لحالة طبية اسمها Takotsubo cardiomyopathy عبارة عن إعتلال وضعف مؤقت في عضلة القلب وإختلال في ضرباته ودا بيبقى البداية لأزمة قلبية أو ما يُسمّى طبيًا بـ ventricular arrhythmias أو حتّى في بعض الحالات المتقدمة الشخص ممكن يُصاب بـ ventricular rupture أو تمزق في جدار البُطين كله وفي 85% من الحالات بيبقى سببها مؤثر نفسي أكتر منه عضوي وممكن جدًا تيجي من فرحة زايدة بردو مش شرط حاجة سلبية، وغالبًا كمان بييجي للستات بعد سن اليأس ...الكلمة نفسها يابانية الأصل Tako-Tsubo عشان أول مرة الحالة دي إتوصفت كانت في اليابان ودي بتوصف حاجة زي مصيدة الأخطبوط عشان لما الشخص بيُصاب بالحالة دي البُطين الأيسر من قلبه بياخد شكل المصيدة كدة أقرب لمربع بيضاوي شوية كدة وإكتشاف الحالة دي نوعًا ما صعب ولسه قدامه تحاليل ودراسات كتير عشان بتتشابه مع حالات مرضية أخرى ومفيش معلومات كافية عنها..المُهم إن المرّة الجايّة لما حد يقولك قلبي بيتعصر من الحزن .. أعذره، ممكن بردو يكون اللي فيه دا بجد وحاجة تبرر تعبه وللأسف إرادته ضعيفة إنه ميقدرش يقاوم حزنه أو يحسّن من حالتها النفسية بنفسه .. فرفقّا بأصحاب القلوب الضعيفة ... #آخر_رف_فوق
صباح الخير ...دا مُعلّم في غانا، بيشرح للأطفال اللّي فالمدرسة برنامج الوورد كجزء من منهج الكمبيوتر بتاعهم مع إنّه مش مُجبر يتعب نفسه للدرجة دي ولا يستخدم مهارته فالرسم كدة بس عملها عشان تلاميذه .. الصورة أول ما انتشرت على السوشيال ميديا ناس كتير انتقدته، وقالت وهو يتعب نفسه ف بلد فقير مفيهاش كمبيوترات ليه، وإيه فايدة النظري طالما مفيش عملي، وكل دا هيتنسي طالما مفيش فلوس يجيبوا كمبيوترات .. حابب بس أقول إن قصّته وصلت لشركة مايكروسوفت وقرّرت إنها تمدّ المدرسة دي والقرية اللّي فيها المُعلّم دا بكمبيوترات وموارد علمية تخلّيهم يطبّقوا النظري اللّي بيدرسوه ويبقى نظام تعليم جديد ليهم ..كلّمني تاني عن الإصرار والإرادة والحلم واللّي بيخلّي كل واحد يجري وراه .. صفعة قوية ف وش الناس اللّي مش وراها حاجة غير الكلام اللّي ملوش لازمة والمُحبِطين وكاسري المجاديف الأوساخ .. سوري إندمجت شوية ..
نسخ الرابط