خواطر_بقلمي#
سواد القلوب، وغبار النفوس الخربانة بيهبوا على وش البني آدم لإن الكلام، والأفعال فضاّحين مهما حاول صاحبهم يداري.. الناس الدهب اللي قلوبهم، وأفعالهم دهب بيفضلوا دهب حتى لو اتغبروا بشوية تراب، والناس الرُخاص الفالصو الصفيح بيطفح عليهم الصدأ مهما اتلمعوا. #خواطر #خواطر_بقلمي
محدش فينا ضامن نتائج أى سكة بيمشيها، أو قرار بياخده، أو أى فعل في حياته.. المعادلة بتبقى كده قبل أى خطوة: بنحسبها على قد ما نقدر، بنتوكل على الله، بنعمل اللي علينا بدون تقصير، وبنسعى.. صحيح إنك ومهما كانت شطارتك هيفضل قلقك من النتيجة مسيطر، بس برضه هيفضل اليقين في ربنا بيغلف قلقك.. ليه؟.. لإنك هتعرف مع الوقت إن السعى بتاعنا، والنتيجة بتاعت ربنا.. وسبحانه قال ﴿إِنَّا لَا نُضِيعُ أَجْرَ مَنْ أَحْسَنَ عَمَلًا﴾.. وده سبب كافي لاستمرار السعى بإخلاص.. القلب الأبيض لا يتسخ، والواثق بالله لا يُكسر، ونقي النية لا يتوه، وصاحب السيرة الطيبة لا يموت، وقوي التوكل لا يُهزم، ومُلِح الدعاء لا يُخذل. #خواطر_بقلمي #خواطر
نسخ الرابط