لوحات_فنيه_مفضله_محس...#
لوحة الكابوس ...من اللوحات المفضلة عندي لـ Henry Fuseli ومن أشهر اللوحات الّلي بتمثّل جزء من الفولكلور وعالم الأحلام في الوعي الغربي والّلي إترسمت بالزيت في ١٧٨١ وإتعرضت أول مرة في Royal Academy of London في ١٧٨٢ ومن ساعتها إرتبطت بأي موضوع يتناول نفس التيمة بتاعت الأحلام والكوابيس وأثّرت في العديد من الأعمال الفنية سواء كتب أو أفلام وغيره ...البنت نايمة وجزء من عالم كوابيسها متجسّد في الأوضة اللي هو الجاثوم (قرّاء رفعت إسماعيل عارفين الكلام دا) والحصان الّلي باين من ورا الستارة دا يتعبر من رموز الأحلام السيئة عند الغرب في جو كابوسي مُقبض كدة بألوان داكنة وتوزيع إضاءة مخيف .. .الجاثوم Incubus يُعتبَر التفسير الغربي الماورائي للتعبير بتاعتنا "صحيت حاسس بكرشة نفس أو تقل على صدري" أو التفسير الخوارقي للحالة المعروفة باسم "شلل النوم" أو Sleep paralysis (هعمل عنّه بوست مُنفَصل إن شاء الله) وهنا الجاثوم دا بيتمثّل في صورة مخلوق خرافي أو شيطان "جاثم" علي صدر اللي بيحلم وعادة بيبقى مذكر لو اللي بيحلم أُنثي .. ولو الّلي بيحلم ذكر بتبقى النسخة المؤنثة منه باسم Succubus أو كما يُقال إن من أسمائها هو ليليث واللي ليها مكانة عظيمة في الفولكلور العالمي وخاصةً اليهودي الّلي بيذكر إنّها كانت زوجة سيدنا آدم الأُخرى (هعمل عنها بوست منفصل بردو إن شاء الله) .. !.في رأي بيقول إني البنت اللي في الرسمة دي اسمها Anna Landholdt ودي كانت الوحيدة اللي هنري حبّها وكان عايز يتجوّزها وأبوها رفض فرسم الرسمة دي وصوّر "هنري" نفسه أكنّه هو الجاثوم كتعبير عن إنه مش هيسيبها حتى في أحلامها .. !.اللوحة جميلة جمال مُقبض كدة .. ! . #آخر_رف_فوق #لوحات_فنيّة_مُفضلّة_محسن
من لوحاتي المفضلة والله .. .اوحة من فن الرسّام الهولندي Jan van Eyck اسمها Crucifixion and Last Judgement diptych وهي واحدة من إتنين والتانية باسم "الصلب" رسمهم في حوالي ١٤٣٠ – ١٤٤٠ بس دي بحبها اكتر بصراحة عشان تفاصيلها وهمية ...متقسّمة ٣ أقسام، الأول من فوق بيوصف الجنة وفيها السيد المسيح في رجوعه التاني كما هو مذكور في سِفر متّى ٢٥:٣١ وحواليه الملائكة والآباء الأوائل والقديسين "وَمَتَى جَاءَ ابْنُ الإِنْسَانِ فِي مَجْدِهِ وَجَمِيعُ الْمَلاَئِكَةِ الْقِدِّيسِينَ مَعَهُ، فَحِينَئِذٍ يَجْلِسُ عَلَى كُرْسِيِّ مَجْدِهِ" .. فتلاقيه مرسوم قاعد في خُيلاء كدة والجميع حواليه بيمجدّه .. .بعد كدة القسم الأوسط فيه وصف الأرض واللي فيه الناس بعضهم بيًبعَث من تحت الأرض والبعض الآخر من قلب البحر عشان يوم الحساب وفي المنتصف الملاك ميخائيل واقف على كتف الموت اللي متصوّر بهيكل عظمي فارد جناحاته عالجمع .. وحجم الملاك ميخائيل ضخم مُقارنةً بالباقي عشان يبين سيطرته عالأرض ويبرز سطوته عليهم بأمر الإله ...ويبدأ بيه القسم الأخير العظيم في تفاصيله ألا وهو الجحيم اللي فيه الخُطاة بيسقطوا على وشّهم عشان يبدأوا رحلة العذاب مُحاطين بشياطين مش باين منها غير عينيها اللي بتلمع فالضلمة وتعابين وفئران ضخمة كنايةً عن العذاب اللّي شافوه ولسّه هيشوفوه جراء معاصيهم في الدنيا ...افتح الصورة وتمعّن فيها وفي تفاصيلها وأنا قطّعتهالك في 3 صور تانيين بردو عشان التفاصيل تبان ...ملحمة والله من لعب بألوان لتفاصيل لضربات ريشة مش طبيعية .. اتبسطوا ... #لوحات_فنية_مفضلة_محسن #آخر_رف_فوق
نسخ الرابط